വിശുദ്ധ കഅ്ബയുടെ സമീപത്ത് സ്ഥിതിചെയ്യുന്ന രണ്ട് ചെറിയ കുന്നുകളാണ് സ്വഫായും മര്‍വയും. ഇബ്‌റാഹീം നബി(അ)യുടെ സഹധര്‍മിണി ഹാജറുമായും മകന്‍ ഇസ്മാഈലുമായും ഏറെ ബന്ധപ്പെട്ടു നില്ക്കുന്ന മേടുകളാണിത്. ഹജ്ജിന്റെയും ഉംറയുടെയും ഭാഗമായി ഇവ രണ്ടിനുമിടയില്‍ സഅ്‌യ് നടത്തണം.

നാല് സഹസ്രാബ്ദത്തിലധികം പഴക്കമുള്ള ഈ ചരിത്രപ്രദേശങ്ങളെ ഖുര്‍ആന്‍ പരാമര്‍ശിക്കുകയും അവയെ ദൈവിക മത ചിഹ്നങ്ങളായി വിശേഷിപ്പിക്കുകയും ചെയ്യുന്നുണ്ട്.

''സ്വഫായും മര്‍വായും അല്ലാഹുവിന്റെ മത ചിഹ്‌നങ്ങളില്‍ പെട്ടതാണ്. ആരെങ്കിലും ദൈവിക ഭവനത്തിങ്കലെത്തി ഹജ്ജ്, ഉംറ എന്നിവ ചെയ്യുന്നപക്ഷം അവ രണ്ടിലൂടെയും സഅ്‌യ് നടത്തുന്നതില്‍ തെറ്റില്ല'' (2:158).

ശിശുവായിരിക്കെ, ദാഹിച്ചുവലഞ്ഞ ഇസ്മാഈലിനുവേണ്ടി ഉമ്മ ഹാജര്‍ വെള്ളംതേടി പരക്കം പാഞ്ഞത് സ്വഫായ്ക്കും മര്‍വയ്ക്കും ഇടയിലായിരുന്നു.